।।जै ठां भेटए अहार ।।

अनेक-अनेक तरहक

सामाजिक-मनोवैज्ञानिक सुरक्षा कें अकानैत

जोगीलाल

बनौलनि दूमहला मकान

दूमहला पर घरबास भेल

तं ओतए इजोत जरल

इजोत देखलनि तं जुमै गेलाह

एक-सं-एक नेमव्रतधारी बहादुर

कीट,फतिंगा,नन्हकी आ गन्हकी

जै ठां भेटए अहार,तत्तहि करी विहार

ई जे कानून छियै

से कोनो भारतीय सरकारक कानून तं छियै नहि

जाहि मे सेक्सन सं बेसी भोकांडे पाओल जाइ

पहुंचलाह कीट-फतिंगा-वृन्द

तं पाछुए लागल जुमलाह महाशय बेंग

जै ठां भेटए अहार……

आ, आइ जोगीलालक दूमहला पर

साक्षात नागराज देलखिन अछि दरसन।

वैह बात !

जै टां भेटए अहार तत्तहि करी विहार……..

व्यथित छथि जोगीलाल !

हौ बाबू जोगीलाल,

आब की करबह?

कते-कते व्यथें एक्के जनम मे मरबह !!