।।मदना मायक गीत।।

मदना माय के छलै सेहन्ता

खइतहुं पूडी-खीर

सेहो मन लगले रहलै।।

बड अबोध मन, कांचे तन लए

गेल छली ओ सासुर

खूब खटय ओ खूब कमाबय

भरय ने तैयो आंजुर

गललै देह, पडाएल जुआनी

जिनगी पीडे-पीड

मुदा मन लगले रहलै।।

बडे आस सं मदना सन-सन

तीन पूत जनमाओल

सोचय, हएत कमासुत बेटा

भागत दुख, मन भाओल

जखने आएल पुतहुआ, भेला

भिन्न-भिन्न सब वीर

ओकर मन लगले रहलै।।

आएल बुढारी, मदना माय के

संग ने देलकै दैबा

बेटा-पुतहु के, पोत-पोतिक

करय दम्म भरि सेवा

अन्त समय सडके पर बितलै

अहिना गलल शरीर

ओकर मन लगले रहलै।।