।।भैया जीक गीत।।

भैया सौंसे जनम गमौलनि सुखक तैयारी मे

नून-हरदि-तरकारी मे।

भैयाक नेनपन पढिते बितलनि

तहिना गेल जुआनी आधा

भैया रन-बन खूब बौएला

जिनगी लागनि बाधे बाधा

कहुना नोकरी किनलनि जथा बेचि पैकारी मे।।

भैया बड-बड पाइ कमौलनि

बहु-बेटा कें खूब खुआओल

गां मे बडका महल बनौलनि

लोकक हिरदय सांप लोटाओल

लेकिन, चैन-निन्न सब बिला गेलनि बटमारी मे।।

भैया वृद्ध भेला तन कांपय

भैया राम-नाम मे लगला

बेटा सब अबंड बहरेलनि

सुख के स्वाद ने पाबय सकला

अहिना जमराजक घर चलला महा लचारी मे।।

भैया सौंसे जनम गमौलनि सुखक तैयारी मे

नून-हरदि-तरकारी मे।।